民建聯今年成立25周年，即將花費數百萬舉行連串慶生活動，重頭戲係9月23及24日喺紅館上演兩場話劇，劇目名稱係《愛國愛港二次元》，導演係高志森，幾大元老曾鈺成、譚耀宗、陳鑑林及葉國謙等都會粉墨登場，齋聽個名都估到套劇「紅」到爆。民建聯仲特別推出名為「建仔」嘅吉祥物，唔知會唔會有炒風？
民建聯近日亦趁25歲生日舉行集思會檢視工作，黨主席李慧琼透露話未來要加強幾大方向，包括培育多元人才，好似管治、助選以至意見領袖等，其次係服務專業化及推動工作網絡化等。檢討選舉經驗後，發現網戰好重要須力推，難怪近期民建聯facebook不時出狙擊泛民嘅post，原來佢哋去年中已成立網隊，秘書長陳學鋒係核心，當然有請外援。

周浩鼎負責勾結外國勢力

佢哋仲話未來要加強各界及各階層嘅聯繫，身兼黨團召集人嘅副主席陳克勤話，希望日後多同局長及常秘喺政策制訂初期見面，反映意見；另一副主席周浩鼎就被委派「勾結外國勢力」重任，負責聯絡本地外國商會同駐港代表。而佢哋亦已向林鄭推薦問責官員名單，但人數不便透露喎。