【新增影片】
由艾華遜（Allen Iverson）同美國饒舌歌手Ice Cube牽頭成立嘅「Big 3」三人籃球聯賽，周日喺紐約布魯克林上演處子show，惹來
廣泛關注。不過，睇球星懷緬那些年，都要知道咩玩法先得，賽會都好貼心，整咗條Q版Ice Cube片同大家解釋吓賽例，因為真係幾複雜！

同平日睇開嘅籃球賽唔同，開波唔使jumpball，由「主隊」先開波，一隊首先以兩分或更大差距射入60分就贏波，半場同樣唔係計時制，而係是旦一隊到30分就完半場。每個攻勢設有14秒起手時間，雖然兩分、三分波同平時規矩一樣，但場上設有3個「四分波」圓圈，只要球員出手前有一隻腳踩住圓圈就計數…

另外，每次犯規如果唔係「and-1」只會被吹罰一記罰球，但會按起手者位置而決定罰球射法，例如兩分波就喺罰球線起手，入咗攞兩分，三分波就喺三分線起手，入咗攞三分，四分波一樣係咁玩法。技術犯規（T-Foul）同樣有「combo式」刑罰，首次技犯會畀對手射一球兩分罰球，第二次就會射兩球兩分罰球，如此類推…至於搶完籃板「出圈」、但偷波或者對手投籃唔中框可以即刻補中，就同一般街場打法相似。仲係睇唔明？一於聽Ice Cube解釋啦！