邵音音喺日前一個慈善晚宴上透露自己患癌後，今日終公開現身，喺觀塘為奇妙電視節目《使乜驚 大兩Gen》拍攝，同場仲有黃文慧(Bonnie姐)、林俊賢囡囡林鈺洧、湯加文、吳智杰、鄺芷凡同黃溢濠。見到音音姐精神好好，影相嘅時候，除咗擺晒甫士之外，仲金雞獨立添。

講到今集內容，音音姐同Bonnie姐跟一班後生鬥舞，音音姐話：「新潮舞點識跳，頭先都係練咗幾分鐘，老師在場提都冇用。」以前冇去party跳舞﹖佢表示：「邊有時間，咁多戲拍，以前嘅明星唔出嚟玩，以前坐巴士冇錢，方小姐(方逸華)都鬧你，冇衫着，方小姐好仁慈，叫你去服裝間揀，佢自己好慳儉。」提到方逸華嘅追思會舉行於本月12日，音音姐表示未知當日要唔要開工，佢仲話：「驚被記者追問我幾時死囉，有啲唔識講嘢，問啲嘢係嚇到你心臟病。」

問到音音姐嘅情況﹖佢話：「你睇我好唔好吖﹖總之要死嗰陣實知㗎啦，唔通知你哋都知㗎啦，生命啲嘢就係咁，所以大家都要珍惜。」朋友介紹醫生俾你？佢表示：「唔使，使乜介紹，我又唔係白痴，日日全部電話都係介紹醫生俾我，介紹藥俾我，介紹床位俾我，所以搞到我電話都唔敢聽，一覆電話，我仲要安慰番人哋，收咗線，我其實好疲勞，但佢哋係咪真係關心我呢，又唔係，因為佢哋識我，所以要問，日夜都要重複病情。」

叫人唔好打俾你﹖音音姐話：「我咪出咗話幾10年我都係咁，不過有啲人早知，有啲人唔記得，新一代唔知咁啫，所以問我第幾期，我話更年期呀！個個都係咁㗎啦，個個人都有終點，心態好緊要，後生嘅時候知道咗，我係成日喊，成日唔甘心問點解，其實問點解都冇結果，做人都要面對，好多突發性困難，係人生囉，你知會早過其他人去，你會更覺得人活着係好幸福，要珍惜生命，每個人都唔知死咗會點，但DNA話俾我哋知死亡係好恐佈。」音音姐透露7日(星期四)會送好友陳自強最後一程，將其骨灰撒到海上，佢話：「佢同我一樣，次次入院都希望唔好，使咗好多錢，又出番嚟，佢盡量想將自己心情原諒好多人。」

更多娛聞，喺晒《娛果》
http://fb.com/appledailyent