當年今日
關於我們

【動大事2018】黎明升呢做Daddy 張栢芝誕第三胎

蘋果日報 2018/12/25 00:00

鍾欣潼陳展鵬黎明結婚鄭嘉穎

2018年喺香港娛樂圈可謂喜事重重,有唔少藝人搵到真愛而拉埋天窗,亦都有唔少已結婚嘅藝人誕下佢哋嘅愛情結晶品,當然最值得高興嘅,就一定係結完婚冇耐就同大家宣佈再有喜訊。
要數今年最值得恭喜嘅雙喜臨門,一定係鄭嘉穎今年8月迎娶同佢相差22年嘅陳凱琳(Grace),兩人無懼地震影響,喺印尼峇里舉行婚禮,雖然當時有傳佢倆係奉子成婚,不過佢哋就冇特別回應,直至上月22日,嘉穎同Grace先後以中、英文喺ig公佈已陀B嘅消息,令大家都好戥佢哋開心。
而另一位雙喜臨門嘅,就係陳展鵬同單文柔呢對,喺今年10月,41歲嘅陳展鵬以海陸婚禮娶16年落選港姐單文柔,婚禮當日,兩人異口同聲表示隨時準備做父母,估唔到婚後未夠一個月,兩人先後於社交網宣佈造人成功,準媽咪更喺Ig晒BB裙,暗示陀B女。
雙喜臨門值得高興,可以搵到自己嘅人生另一半,當然都值得大家戥佢哋開心。
今年最閃嘅一對新人,相信就係阿嬌鍾欣潼,與台灣「醫界王陽明」賴弘國。阿嬌舊年同賴弘國撻着,拍拖半年,今年年初賴弘國就求婚成功,兩人5月喺美國洛杉磯舉行pre-wedding party,到12月就喺香港擺酒兼註冊。
除咗阿嬌搵到好歸宿外,蕭正楠早前就喺大台頒獎禮上,公開多謝「太太」黃翠如,其後佢又指喺今年暑假前,已經同拍拖4年嘅翠如註冊結婚。另外,今年結婚嘅藝人就有林子善同拍拖五年的圈外女友董佩欣;相戀7年嘅歌手羅力威、雨僑;處女黨最後一名成員苟芸慧同賽車手陸漢洋;年齡相差25年、06年落選港姐李美慧嫁曾文豪;卓韻芝同有「閃電俠」之稱嘅梁子賢;著名填詞人、58歲潘源良與年輕17歲的加拿大女友Rita;53歲韋家雄同「銀行之花」鄧楚雅;黃德斌同拍拖13年圈外女友Joyce Wong;TVB「公公王」陳榮峻與吳香倫;張文采與任職消防員嘅盧樂輝;77歲的「電影海報教父」阮大勇與細佢31年嘅許慧韶;「生煎包王子」蕭潤邦與江若琳;林師傑與歐陽巧瑩;以及與同性結婚的時裝設計師鄧達智及外科醫生陳梓欣,上年擺完喜酒,今年在倫敦註冊;至於吳綺莉19歲女兒卓林,則與31歲女友Andi在加拿大結婚。
講完結婚,今年娛樂圈亦有好多藝人生B,包括有鍾嘉欣、前港姐冠軍張名雅、Coffee林芊妤、宋熙年、吳雨霏、李悅彤Liddy、吳日言、名模Jessica C.、前港姐陳華鑫,而名媛蔡一鳳就生咗對龍鳳胎、熊黛林亦生咗一對孖女。至於今年38歲嘅張栢芝,喺今月亦透過工作室宣佈自己喺11月時,誕下男B「小王子」,而栢芝亦有拍片多謝大家關心,不過就冇透露BB嘅爸爸係邊個。另外,李亞男喺12月17號,亦為王祖藍誕下B女。
不過講到最矚目嘅BB,並唔係女藝人所出,而係為黎明(Leon)誕下小公主嘅陳泳儀(Wing)。今年3月,有傳Leon戀上女助手Wing,更傳出Wing已懷孕6個月,隔咗幾日後,Leon就喺fb公開認愛之餘,更承認準備做爸爸,「有了小生命更將令我成為父親,並帶我進入人生中另一階段。」到4月,Wing就為黎明誕下囡囡,當月喺東莞舉行演唱會嘅Leon,更表明稍後會公開囡囡近況。四個月後,講得出亦做得到嘅Leon,亦主動喺fb公開囡囡照片,照片中見到小公主肥肥白白超可愛,而個樣仲同爸爸十足餅印一樣。榮升為爸爸嘅Leon,更開心留言:「我的女兒……好胖呵呵……平凡是她的運氣!分享!一直和我一起成長的家族朋友。」而大家見到Leon個囡囡咁得意,都紛紛留言大讚B女得意及送上祝福。
除咗Leon外,余文樂、陳柏宇、李璨琛、組合廿四味成員梁永傑、Mr.成員DASH等,喺2018年亦先後加入新手爸爸行列,至於已有小朋友嘅謝天華、何基佑、李泳漢,今年亦再添丁做爸爸。
精選娛聞,喺晒《娛果》
http://fb.com/appledailyent
empty
(網上圖片)
empty
52歲嘅黎明,今年升呢做爸爸(資料圖片)
empty
黎明嘅小公主,肥肥白白非常可愛(fb圖片)
empty
今年8月,鄭嘉穎同陳凱琳無懼地震,喺印尼嘅峇里舉行婚禮(ig圖片)
empty
到11月,佢哋就齊齊宣佈陀B(ig圖片)
empty
陳展鵬同單文柔結婚未夠一個月,就宣佈有喜(ig圖片)
empty
阿嬌今年5月,同賴弘國喺美國洛杉磯舉行婚禮
empty
有傳張栢芝喺上月,為新加坡富商生咗個仔(微博圖片)
empty
鍾嘉欣今年亦為脊醫老公誕下男B(ig圖片)
empty
熊黛林今年生咗對孖女(ig圖片)
empty
謝天華亦再做老竇(微博圖片)
empty
陳柏宇加入新手爸爸行列(ig圖片)
empty
余文樂亦做咗爸爸(ig圖片)
empty
蕭正楠多謝完太太黃翠如後,兩人仲喺台上嘴咀,so sweet
empty
生完第三胎嘅栢芝,拍片多謝大家嘅關心(網上截圖)
empty
榮升爸爸嘅王祖藍,亦喺網上晒佢同亞男捉住B女嘅手仔相(微博圖片)