今年成績特佳嘅香港壁球隊真係旺上加旺，繼「1哥」李浩賢下月結婚後，「2哥」劉少維（Dick、小圖）前日趁拍拖兩周年，求婚成功，但Dick同22歲未婚妻Sardoona（上圖左）打算搵多啲錢，最快2013年先註冊結婚，而下周日（13日）就出戰香港公開賽外圍賽，希望儲定奶粉錢。

Dick同任職空姐嘅Sardonna早就計劃拉埋天窗，呢場求婚大作戰都係「象徵式」啫。話說Sardonna嗰日放假，去澳門支持男友打職業計分賽，Dick喺賽後鼓起勇氣，拎起一早預備好嘅鮮花同鑽戒，雖然話係「象徵式」，但一啲都冇馬虎。Dick跪喺地一邊講一邊喊，場面真係sweet到爆，結局係點？唔使講都知喇！大作戰成功後，Dick仲將珍貴一刻放上facebook做profile相，公告天下。
Dick家先25歲，但對將來有晒部署，諗住打多3至5年就掛拍，然後轉做健身體能教練。佢已經開始睇樓，由於兩人都鍾意養寵物，Dick係愛魚之人，而Sardoona就愛養狗，所以村屋都會考慮。