西班牙禮拜一喺歐國外F組主場3:0輕取瑞典，四戰全勝排榜首，場波本身冇乜特別，不過門將迪基亞繼續坐冷板，已經係連續三場國際賽由阿列沙巴拿加（Kepa）擔正，助教摩蘭奴解釋話效力曼聯嘅迪基亞季尾表現太差，據報同紅魔只餘一年約嘅迪基亞，想快手轉去巴黎聖日耳門（PSG），紅魔甚至肯俾2,000萬鎊（約2億港元）佢做分手費，以免下季人財兩失呀！

主帥安歷基因家事繼續未能喺場邊領軍，今場西班牙有沙治奧拉莫斯、艾華路莫拉達一人入一球12碼，連同中場奧耶沙巴爾遠柱得手，西班牙3:0輕取瑞典排F組榜首，五分領先瑞典及羅馬尼亞。場波最特別除咗係中堅拉莫斯近8場第7次有波入之外，就係迪基亞又坐冷板冇得踢，連續三場國際賽被貶。摩蘭奴就話係Kepa季尾態好：「佢喺歐霸盃決賽同英超最後幾場都踢得好好，夠晒集中。」相反，迪基亞由上年世盃開始不時犯錯，曼聯季尾0:4輸俾愛華頓嗰場，輸球遠射反應好慢就最肉酸。而迪基亞一路唔肯同曼聯續約，合約去到最後13個月，曼聯有傳為咗唔好人財兩失寧願割愛，PSG肯出6,000萬鎊買迪基亞頂替保方，所以曼聯甚至肯分三份一俾迪基亞落袋，大家好來好去。

--------------------
【新聞有價】6月17日起 繼續撐蘋果
http://bit.ly/2IJ24ZR
--------------------
《體蘋果》陪你睇波講波
https://www.fb.com/appledailysports