人日宜拜年，不過港台高層例外。八方唔係堪輿玄學家，唔曉五行運程，不過知道港台高層今日應該幾頭痕。事緣港台今日舉行一年一度傳媒機構團拜，商務及經濟發展局局長劉吳惠蘭係主禮嘉賓，各傳媒機構頭頭都會到場，主人家係署理廣播處長梁松泰，港台節目製作人員工會事先張揚，擺明車馬要為台長「開年」。

唔畀直播華叔安息禮拜

話說港台工會上星期去信管理層，要求解釋一單疑似自我審查、涉嫌干預編輯自主事件。件事關於已故支聯會主席司徒華安息禮拜，港台本來準備就緒、工作人員各就各位做網上直播，點知梁松泰忽然落柯打話唔使做，結果港台只在網上提供超連結到支聯會網站。
港台以前做過捨身救人義工阿福追思會直播，四川賑災、傳遞奧運聖火都做過網上直播，因此今次唔直播華叔安息禮拜，肯定唔係技術問題，亦唔係開先例。港台中人質疑有人睇見特首及其他局長冷待華叔後事，為免做多錯多令上頭唔高興，所以「跟大隊」，嗌停網上直播。
今個星期一最後一日返工嘅廣播處長黃華麟，收工前回覆工會，指港台新聞部、電視部都好重視報道華叔後事，網站亦有專頁提供最新消息，甚至派出工作人員參與安息禮拜直播安排，至於是否有人自我審查、干預編輯自主，麒叔隻字不提。

促請政府公平請新台長

工會批評黃華麟迴避問題，因為工會要求管理層解釋點解下令唔做直播，麒叔對此問題視而不見，一於將燙手山芋留畀梁松泰自己執手尾。工會表明，希望其他傳媒機構趁今日團拜追問港台高層解釋上述事件，八方亦好希望梁松泰可以在人日畀個滿意答案大家。
「撐港台運動」噚日發表聲明，表示「有足夠理由相信」梁松泰係干涉編輯自主嘅幕後黑手，批評官員咁做最終係將作為公共廣播機構嘅港台「喉舌化」，淪為歌功頌德傳聲筒，又促請政府「真誠而公平」招聘新台長，而唔係搵個「空降奇兵」去整治港台，干擾港台自主。

mailto:[email protected]