【子健蘋馬】來港前跑膠沙地入晒Q！韋達部下充滿皇氣
蘋果日報 2019/10/26 21:30
泥地韋達餘皇膠沙地子健蘋馬
韋達從練表現得到肯定（香港賽馬會）- 餘皇在愛爾蘭兩戰膠沙地一冠一亞
沙田馬場明日（27日）頭場五班泥地1200米，若唔知「餘皇」底細，也許會問，點解無端端報泥地？因為「餘皇」在愛爾蘭跑兩次膠沙地，取得冠亞各一佳績。
即使唔計外地績，「餘皇」前季曾在四班泥地同程追近，應更能解讀，韋達點解會安排「餘皇」跑今場。
落到五班，只要集中跑1200米，無論谷、田抑或泥地都夠份量，上次落班跑1400米，頭1000米先被頂在四叠，入彎前三叠，蝕到入肉都輸唔遠，結合前仗四班入位，可以肯定「餘皇」此時段狀態、戰鬥力，大抵是來港後最強！
韋達幫佢搵出路，重戴眼罩兼換沈拿跑泥地排7檔，不單唔蝕，有時還有好無差，對手比上次大幅減弱，加上內側快馬唔多，話唔定有好際遇。
第六場四班泥地1200米，「威風駿馬」上仗初出同程，輸畀「理想回報」跑第四，今次拆兩組，縱再遇後駒，一來負磅差距，由受讓6磅變12磅，二來有換史卓豐，加單邊眼罩變數。
其實上次如非，田泰安騎得唔夠積極，彎位人騎佢唔騎，才有所謂外避表現，今次表面排更外的7檔，但內側1至6檔都唔係快馬，除非又唔積極，否則變身好合理。