亞視股東代表何子慧早幾日開記招大晒500萬現金嘅行李喼同500萬支票，之後德勤炒晒班亞視員工，然後又再請百幾人運作亞視，但就唔比員工追討之前欠薪。

對於近日呢個亂局，前執行董事葉家寶今日接受《蘋果》訪問時話好傷心:「好傷心，諗唔到亂得咁犀利。成件事好似一齣鬧劇，點解間公司搞到咁離奇，好似電影，你曬喼錢做乜事呢？出糧係最緊要，唔需要曬，有錢咪出糧比啲同事囉，我覺好可悲。我自己都成日反省，當初我哋堅持係覺公司有希望，原來最後個希望變到咁樣，最後結局係咁樣，真係好肉酸。」

家寶話舊年通訊局話唔續牌比亞視，有好多做呢行嘅朋友打電話比佢，話呢一年好玩，反正續唔到牌，不如大膽啲試好多新品種，同唔同人合作，令香港觀眾睇番亞視！家寶話:「當時點解做唔到，係因為種種原因，因為好多問題，無奈收到話有新投資者嚟，新投資者講咗一年，話乜嘢三亞慨念，又話投資100億，做咗好多嘢，我哋都好諒解，因為可能新投資者股權未轉讓，好多種種問題，或者得唔到好多人認同，所以佢集資亦都有問題，變咗我哋資金有問題，但我心諗，你諗住買亞視，你一定要有晒掌握㗎嘛，唔可能嚟到先搞資金，我真係覺得呢一年浪費咗，如果唔係呢一年我哋好好運用，我哋可能會做到一啲奇跡出嚟，或者起碼令到香港觀眾喺亞視終結嘅一日，都有美麗回憶。而家呢個回憶真係好肉酸好核突，亦比好多人恥笑，比好多人唾駡。」