王曼喜（Kayla）同Rosemary今日喺觀塘出席「apm動感Summer Fun」活動，Kayla近日喺ig開咗個支持同性戀群組LES Baes HK，佢話：「係呀，我兩年前認咗出櫃，覺得LGBT（同性戀關愛群組）好貼心，我想為香港後生一代，令佢哋覺得唔係孤單嘅，係有人可以傾訴。大家經歷一樣，集合起嚟會容易接受。」問到係咪好多人搵佢傾訴？Kayla就話：「要慢慢build up，後生有講自己嘅苦衷，但係我一個幫唔晒，所以就成立群組，我想將佢變成一個小社會咁，o依家有50人以內，唔算多，大家支持大家嘅圈子。」Kayla話佢咁做係想發放正能量，大家都係為咗愛，希望身邊嘅人唔好用唔好嘅眼光睇同性戀。

同時Kayla亦放咗張坐喺花海上面嘅靚相，問到係咪有新戀情？Kayla就笑話：「唔係呀，嗰度係個event，我見好靚所以影，o依家冇人追。」妹妹麗嘉兩個禮拜後就從美國返香港，Kayla話佢哋應該會兩姊妹去旅行，唔知兩姊妹會唔會繼續影多啲性感靚相派福利？Kayla就搞笑話：「放心，我妹o依家唔喺沙灘就喺泳池。」

另外，Rosemary下月將會同老公旅遊，計劃去秘魯、希臘、峇里同斐濟等地，盡享二人世界，Rosemary話：「今年我哋少見面，所以會去一個月旅行，好開心。」問佢會唔會趁機造人？Rosemary話：「要享受過程，有質數係最重要，不過我都要忙完手上嘅工作先可以諗生小朋友。」