【新增內容及動新聞】
武漢肺炎疫情令百業蕭條，連屹立北角40年的上海僑冠理髮店亦不敵疫情被迫結業。「做咗30幾40年... ，其他（上海舖）都死晒」，操一口上海口音廣東話的高老闆感嘆。資深的理髮師傅無奈稱：「（特首）林鄭月娥，點解唔幫下我哋。幫咁多行業，又唔幫我哋。」

曾有不少名人幫襯、位於北角渣華道72號的上海僑冠理髮店開業近40年，全民保育行動發起人袁智仁在facebook貼文稱，理髮店原本以往周六、日，平均約有100多人光顧理髮，但疫症下跌至30多人，老闆不停蝕錢下，政府又對他們毫無援助，無法捱下去而唯有結業。

老闆嘆生意大跌三分之二：冇本錢蝕呀

《蘋果》下午到該店向老闆了解。高老闆指，僑冠明日（30日）起將會正式結業，今日為最後一個營業日，將開門至黃昏6時，「聽日開始我都冇話事權，交畀業主」。他指該舖位租金不算貴，每月約7萬元左右，惟因肺炎肆虐，生意大跌三分之二，「冇本錢蝕呀！呢個疫情蝕得太多⋯⋯如果仲有三分二（生意）我都做落去」。

高老闆又指，過去兩個月平均每月蝕至少4萬，至3月終感「頂唔順」決定結業，「可惜都冇用，慘都冇辦法⋯⋯冇得返轉頭㗎喇！」他稱，未來不會考慮再「重出江湖」，自己亦唯有「打份工」維持生計。

袁智仁的fb貼文引述高老闆稱，他從事髮事業超過半世紀，是這間有39年歷史的上海理髮店第二代接班人，卻亦是最後一位掌舵人。文中引述該高先生稱，不少名人亦屬該店客人，「我13歲就幫郭得勝剪頭髮，連其士集團創辦人周亦卿，歌手呂珊也是我的顧客。」文中亦稱僑冠是上海理髮界的龍頭店，設有女禮賓部，吸引不少海外遊客幫襯。

此外，僑冠的裝潢亦保留80年代設計，華麗亦具特色，如從1樓登上2樓的女賓部，會經過紅色樓梯及用鏡子砌成的五花十色燈飾，恍如走進電影「花樣年華」的場境，店內3張日本理髮椅子亦是60年代產物，當年一張售價達8,000元 ，現時已經成為珍貴的古董。

年青顧客：上海舖師傅功架好 亦是傳統文化

最後一天營業的僑冠，今日店內熙來攘往，客人要排隊等候理髮。居住在新界的吳先生專程來光顧，「都喺到剪咗幾年，想剪最後一次」。與普通理髮店相比，吳先生認為上海舖師傅功架較好，亦不認為老一輩才會到上海舖理髮，「唔會覺得呢到老，而我後生（來理髮）會係一件突兀嘅事」，在該店結業後，更仍會嘗試尋找上海舖理髮。他又指，該店師傅大部份都已上年紀，即使不受疫情影響「可能幾年後佢哋都退休」，故認為結業「冇話可唔可惜」。

到僑冠理髮已2年的熟客葉先生指，這裏除了價格相宜外，師傅手勢亦較好，故自己會固定來光顧。他稱，上海舖現時已買少見少，同時是傳統香港文化的一部份，如上海舖消失，感覺市區面貌「少咗啲嘢咁」。葉又指，小時候在該區上學，經過僑冠時都會「覺得好得意」，但一直都沒有光顧過，「反而大個出嚟做嘢先嚟」，而在僑冠結業後，自己仍會尋找其他上海舖理髮。

葉續指，上海舖對年輕一輩而言可能會有神秘感，但剪過後會發現是傳統文化的一種展現，加上現時潮流流行剪「油頭」，形容上海師傳正是剪該髮型的佼佼者，很多外國髮型師都是跟他們學師。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架