311補選已完，有一個應該311之前出嘅post，竟然今日先至洗版——當然，依家洗版嘅係李嘉誠，但今日成個上半晝，佢喺fb洗晒版咁滯。

佢，係哪叱方國珊。但係如果唔睇字，你係根本估唔到呢個係方國珊，因為輯相已經係攝於上世紀八十年代，嗰陣嘅方國珊仲係演員，代表作係哪吒。

之後方國珊嘅專頁先至「做嘢」，整咗個「出賣方國珊系列」，執筆嘅小編話：「好多記者朋友打嚟話要攞方國珊嘅『軍糧』，聽到個下都呆一呆。唉，老實講，選完之後，我哋班助理依家得番狗糧。」再話：「老老竇竇，有得食唔食，罪大惡極。食住先啦，唔夠飽，下星期緊貼我地嘅專頁。」Hashtag係「#其實方國珊逼我地出#就嚟三點三係時候食返個tea叉叉電#無論幾靚嘅女仔都有變阿嬸嘅一日#依家都好靚#做女人最緊要錫自己」

網民睇完都話方國珊選舉團唔識做公關，應該早一個禮拜出圖，分分鐘可以改寫戰果，又紛紛留言讚少女方國珊好靚，話佢似糖妹呀陳慧嫻呀咁……驚為天人。

白羊座嘅方國珊，1966年出世，父親喺中環街市賣家禽。方國珊曾就讀過香港真光幼稚園、香港真光中學小學部、聖公會基恩小學、威靈頓英文中學同新法。84年方國珊讀亞視藝員訓練班，同屆同學係葉子楣。成名作《哪吒》，拍於1986年，冇錯，係亞視劇集嚟嘅。

那些年嘅方國珊，絕對絕對係嗒得杯落，嗰陣佢20歲咋。息影之後，方國珊去美國讀工商管理學士，仲拎埋英國專業工程師學會專業工程師資格。曾與陳秀雯合資做生意，結果不歡而散，仲對簿公堂。

01年，久未露面嘅方國珊喺一個公開活動現身，佢話已轉行多年，依家做緊屋宇處認可適任技術員，工作範圍主要係負責拆卸同斜坡鞏固工程。之後方國珊識咗上一代「新界王」張人龍，成為佢秘書，仲喺張人龍引薦下成為新界中小企總會會長，入埋自由黨，開始從政，且甚受田少器重，就連政府當年都想搵佢入局擔任政治助理，民建聯同新民黨亦曾向之招手，但方國珊揀嘅係另一條路。頗堪玩味嘅係，方國珊又同泛民唔friend 0架……2011年，方國珊由委任區議員轉戰直選，在環保選區以近9成高票當選。

方國珊另一件傑作，係一年7.1大遊行，無綫記者成箭靶，俾部份示威人士當場揶揄，小花郭詠嘉受盡委屈淚灑當場。當時仍屬自由黨嘅方國珊，自掏腰包喺《蘋果》登廣告，力撐無綫記者唔事旦，又力促一眾事旦男「唔好欺人太甚」。