唔着好過着
我羅拉睇過佐藤江梨子同Gackt拍嘅美容廣告後，都知佢身材好perfect，但佢都唔使上下都咁迫爆啩？與其係咁不如唔着！佐藤為搶鏡唔着底褲上台，真係要歎句搵食艱難。
差啲失手
靚太黑木瞳每次出現都好明豔照人，嗰次佢着全身LV新裝出席一個首映時依舊好後生好潮。不過可能黑木瞳唔記得嗰個係高台，着錯咗條迷你裙，見到佢強顏歡笑個樣，都知佢驚走光。
觸目驚心
叶姊妹呢兩個奇人，無論去見日本天皇定係企街食拉麵，相信都可以着住件接近冇布嘅衫。我羅拉都知現今女藝人去親公開場合都會打底，但要學到叶恭子咁，吓吓露到底線又唔會穿崩嘅，睇怕冇番四、五十年功力都唔掂。
攞威嚇人
唔少女歌手都鍾意喺舞台上着婚紗，天后濱崎步都唔例外，永遠要勝人一籌嘅佢，重要着條成百米長嘅婚紗，威就畀佢攞盡啦，難為喺後面捧紗嘅十幾個dancer咋！