自從合拍片興起，所謂賀歲片淪為爛片代名詞。好地地一套《衝上雲霄》，竟然可以拍到冇story line，證明導演功力無人能及。
歸根究柢，電影業集資難，係令香港合拍片壟斷原因之一。如果產業夠水，想去拍大陸碼頭賺人仔嘅當然照去可也，但一啲想拍本土嘢嘅人亦都有留低嘅空間。財爺預算案入面，將電影製作融資計劃預算製作費上限增加67%，冇錯係好事，但學內地講法，要諗計令資金到位先係重點。如果計劃掣肘多多，話知你增加幾倍，最終冇人愛惠，香港只剩低更多恐怖版《衝上雲霄》。入正題，A股開市後，市場多咗炒作主題，環保股、水務股、內房都開始見到炒味。另可以留意中國飛機租賃（1848），上半年核心多賺近八成，至八千七百五十萬元。至二月初發盈喜，指租金收入增加，令全年收益顯著增長。
呢隻股去年九月時租出三十四架機，另有三十四架於一六年交付，之後又同空中巴士訂購買協議，二○一六至二○二二年接收百架A320。內地對飛機需求大，未來收入再增是常識吧。李嘉誠上年亦涉足呢個行業，你唔信數字都應該信超人啦。隻股早前喺基本因素冇變下係咁跌，相信係獲利盤帶來沽壓。昨日彈7.5%，成交配合，走勢似樣，相信即將上演真正衝上雲霄嘅好戲。

Fifi
http://www.facebook.com/lovefrystock
本欄逢周二、四刊出