憑出演韓國選秀節目《PRODUCE 101》男團版而出道嘅限定男團Wanna One，早前落實將於下月3號襲港舉行粉絲見面會，由於門票迅速售罄，主辦單位為免黃牛黨炒飛，今日就宣佈好消息，Wanna One鐵定加開10月4號一場。

由於10月4號係中秋節，所以主辦都好貼心，特別將當晚開場時間延至晚上9點開騷，等捧場粉絲可以同家人食完晚飯先慢慢欣賞Wanna One嘅表演。而今次加場門票將於下周一可憑Citi Clear Card優先預訂，門票亦於下周三於Cityline購票通公開發售。

今次港騷Wanna One都特別為港迷送上福利，當中幸運粉絲可額外獲得一對一擊掌（每場各有500個名額，合共1000個名額）、參予10月3號記者會（每場各有25個名額，合共50個名額）、簽名CD（每場各有30個名額，合共60個名額）、簽名海報（每場各有30個名額，合共60個名額）、藝人簽名寶麗萊照片（每位藝人每場將提供兩張簽名寶麗萊照片，每場各有22個名額，合共44個名額）等驚喜福利。

而主辦單位亦提示各位粉絲，到時演出期間嚴禁使用手機及相機影相，而且Wanna One喺現場亦唔會接受禮物。

另外，Wanna One將會孖住TWICE、BTOB、Red Velvet等前輩組合，於本月20號現身音樂網站SORIBADA主辦嘅「2017第一屆SORIBADA最佳韓流音樂頒獎典禮」(2017 SOBA)，主辦表示將於當日喺網上進行直播，海外粉絲可以隔空支持偶像。