42歲嘅「台灣第一名模」林志玲，最近又再幫大陸拍攝真人騷節目《旅途的花樣》，喺最近一集入面，林志玲因為嘉賓于小彤突然要離開，佢趕唔切化妝就衝咗去對面間房，就係咁，大家又再有機會見到素顏嘅林志玲喺螢光幕前出現喇！

素顏嘅林志玲，戴住眼鏡，雖然睇落眼睛就有啲浮腫，但喺佢臉上就真係發現唔到歲月嘅痕跡，即係一條皺紋都見唔到，同佢化妝前後分別唔係好大喎！其實今次林志玲同大陸女藝星張歆藝、馬麗、金晨一齊參與《旅途的花樣》，佢哋年紀都比林志玲輕，分別係36歲嘅張歆藝、35歲嘅馬麗同26歲嘅金晨，但係林志玲都真係一啲唔輸蝕，見佢冇化妝咁衝出房間，同去到于小彤房入面時嘅驚訝表情，都冧到唔少宅男㗎！

查實，林志玲又並非第一次素顏拍真人騷，對上一次就係去年嘅《花樣姐姐》，無錯都係大陸真人騷，當時佢就素顏着住喱士睡衣，露出修長嘅長腿，當時都有好多網民激讚。