鄉議局噚日喺荃灣沙嘴道球場舉行第32屆執委就職禮,過百個鄉議局成員一齊宣誓就職。今年鄉議局好大手筆,一擲幾十萬,筵開500席宴請各處鄉民食盆菜,幾千人晒馬,埸面十分壯觀。不過噚日晏晝太陽好猛,無遮無擋露天食盆菜真係幾攞命,八方見好多鄉民曬到面紅耳熱,真係戥佢哋辛苦。
有鄉紳同八方講,今次千人盆菜宴由總務主任鍾偉平揸fit,有人則對就職禮如此鋪張不以為然,有點勞民傷財咁話。噚日文革曾都有畀面到場,八方見佢同「新界王」發叔密斟,據講佢同發叔講,好多新界地方發展落後,包括發叔老巢屯門,開期票話政府會多啲關注。𠱁得發叔不知幾開心,睇嚟以後唔使告御狀咯。