應屆準港姐風頭躉之一的高妹3號張舒雅，憑清純外形但煲煙媾仔的魔鬼天使包裝脫穎而出，身為大寶珠寶（遠東）有限公司太子女的她咬着金鎖匙出世，現居位於九龍塘對衡道、市值近億元的獨立洋房，平日則以平治房車代步，相當貴氣。

前日眾港姐繼續在將軍澳電視城集訓，至晚上9時解散，佳麗大多慳得就慳，分乘張舒雅和8號姚婷芝的順風車離開，懶理儀態的張舒雅在電視城外大步跨欄，載同4號高海寧及另外兩名佳麗上車，先後在將軍澳及九龍塘火車站放低她們後，然後才返九龍塘，她更將車輛泊街，毫不介意隨時被抄牌。
千金小姐張舒雅豪氣成性，其他佳麗卻生活平民，前晚1號文柏姿、2號倫紫玄、6號陳倩揚和11號馬賽齊由高危車手姚婷芝接載，滿載一車人的姚婷芝繼續飛車，超速兼衝燈，車技恐怖。
大前日被拍得趕瘟仔的文柏姿最快落車，先抵牛池灣的新麗花園，接着姚婷芝載馬賽返浸會宿舍，任職空姐的倫紫玄和陳倩揚則在沙田火車站轉乘火車，問倫紫玄知否姚婷芝衝燈危駕？她卻扮驚訝說：「有咩？我唔知喎，都唔係我揸車。」其後她坐火車到大埔墟落車，再乘的士返汀角路蘆慈田村屋寓所，而姚婷芝送走所有佳麗後即返沙田香閨。

此外，昨日12位準港姐返回將軍澳電視廣播城進行訓練，日前文柏姿及10號史宛殷雙雙被拍得獲男伴駕車接送，文柏姿直認司機是男友，她說：「大家係大學同學，不過我哋都有共識參選之後少見面，佢都好支持我，唔會影響感情。」史宛殷則說：「佢係我表姊男友，不過我美國係有男朋友，感情穩定，佢都好支持我參選。」
採訪、攝影；娛樂突發組

各位讀者如果認識十二位入圍港姐，知道她們的底細，歡迎電郵mailto:[email protected]報料。