7月14日係全城愛蝶日，行會成員陳智思同環境局副局長陸恭蕙連續第四年為綠色力量擔任「蝴蝶大使」，活動今年仲特別聯乘著名木雕藝術家王天仁，利用廢木升級再造多件大型蝴蝶同蟲蟲藝術品，陳智思同陸恭蕙各自喺木蝴蝶上色，身體力行撐保育。

陳智思藝術系畢業，擅以塗改液作畫，今次亦迅速「點出」自己嘅木蝴蝶，有別蝴蝶嘅五顏六色，呢隻黑白蝶相當有型。原來陳智思刻意以型格取勝，話相信大家喺遠處已經被佢呢隻蝴蝶吸引。愛行山嘅陳智思經常見到蝴蝶，佢話正因常見而會忽略保育佢哋嘅重要性。

陸恭蕙畫嘅蝴蝶就五彩繽紛，紅綠配加以不同色彩點綴，令呢隻木蝴蝶栩栩如生。佢話大自然所有生物都息息相關，生物多樣性非常重要，希望各界多加關注。佢哋聯同其他大使嘅嘅作品下月中於《BUTTERFLYWONDERLAND觸木蝶變》巡遊展出，詳情可參考呢個網址：www.shell-greenpower.net/714