香港舊年全年平均通脹4.3%,長實一班執董包括小超人加薪5%,多過通脹,表面好似唔錯,其實可能要打手板,事關睇番資料,長實七名執董2012年加薪幅度介乎5.2%至9.8%,2011年仲介乎5.4%至15%,可見老闆超人往年加人工手鬆好多。
長實舊年賣樓只得20億元,但核心盈利仍然可以增長26%,賺179億元,優於市場預期,一班執董只係劃一加薪5%,加幅明顯保守。唔通超人預計今年地產市道一般,所以唔可以咁豪爽?
至於「打工皇帝」霍建寧,雖然話舊年幫手將港燈(2638)分拆上市,但都係加薪5%,主要係酌情花紅加5.2%,有1.75億元,加埋底薪同其他,全年袋1.88億元。另外三位和黃執董周胡慕芳、陸法蘭同埋黎啟明就加薪唔夠3%。
超人當然又係只收長實5,000大元袍金,不過大家唔好忘記佢有巨額股息收,股息又唔使交稅,唔好講中期同末期息,淨係和黃最近減持屈臣氏股權,超人會收到超過70億特別股息,佢仲話唔係一件事㖭呀!
李華華
mailto:
[email protected]