曾出演韓劇《任意依戀》、《醫療船》嘅21歲男星李瑞元，今年5月被爆涉嫌性騷擾及恐嚇同行女藝人，李瑞元隨即被劇組《想暫停的瞬間：About Time》及音樂節目《Music Bank》Out走，更被檢方起訴，需上庭接受聆訊。

李瑞元涉性騷擾案今日喺首爾東部地方法院進行第一次審訊，戴住Cap帽、身穿白恤衫黑褲嘅李瑞元現身法院，見到喺現場採訪嘅媒體時，再次就事件道歉。據悉，李瑞元透過代表律師稱承認所有罪行，但強調當時係醉酒狀態，對於當時發生嘅事一啲都唔記得。李瑞元代表律師又指，受害人落口供時曾表示李瑞元醉到企唔穩，難以理解李瑞元被起訴性騷擾，隨後以精神微弱為由望法院輕判。

完成審訊後，李瑞元被問到有冇向受害人道歉，李瑞元稱曾試圖聯絡對方道歉，但對方一直冇聽電話，未有提到聆訊嘅事。而第二次聆訊將於9月6號進行。

更多韓流，喺曬《娛果》
http://fb.com/appledailyent