今晚喺中環加州大廈舉行一個頭髮護理品牌發佈派對，邀請咗「城嫂」方媛（Moka）同薛凱琪（Fiona）等嘉賓出席。

薛凱琪接受訪問時自爆早排原來入咗醫院，佢話：「前幾日食物中毒，腸胃炎入咗醫院，可能自己太攰身體支持唔到，因為同行嘅媽咪同助手都冇事。」

講到今日呢個頭髮護理嘅活動，薛凱琪話：「自己睇一個人嘅時候會睇頭髮先，我相信啲人如果頭髮打理得好亂，個思維都會亂啲。」咁揀男朋友呢？薛凱琪笑言：「自己嘅伴侶例外，就算對方有頭油或者好亂形象好肉酸都冇所謂，因為我揀嘅人係要專一，光頭都ok，最緊要個人。」

工作方面，薛凱琪早前出咗CD禮盒抽獎，將會有一百位得獎者可以同佢約會，薛凱琪話：「我已經諗到做咩，佢哋可以同我傾心事啦，又可以無限影相，有一半嘅Fans會同我同媽咪去執垃圾，做垃圾分類，而另一半就會同我同老闆娘去同社區嘅小朋友玩。」

精選娛聞，喺晒《娛果》
http://fb.com/appledailyent