楊玉梅、麥長青同王賢誌等今日喺黃埔為陳錦鴻有份投資嘅酒樓開幕擔任嘉賓，陳錦鴻話已經同呢班股東夾份投資咗好耐：「由沙士嗰年開始，因為我拍《創世紀》嗰陣做資料搜集，識咗呢班朋友，許文彪就係由佢哋身上學返嚟。到沙士嗰陣，我冇晒工作，佢哋就支持我做飲食，o依家開到第三間啦。」

陳錦鴻話中途都曾經休息過冇做酒樓，當時為咗想好好照顧囝囝先：「直至到o依家囝囝開始大個，我又出番嚟拍嘢。o依家幫ViuTV拍緊劇，有鄧萃雯、廖碧兒同談善言，周旋喺呢3個女仔中間，好開心！」陳錦鴻話拍番劇都係為咗個仔，想佢知道爸爸工作都好辛苦，亦都想教佢做人唔好咁死心眼：「佢同我對戲，可以從中教佢拍拖唔使咁大壓力，我最怕阿仔喺感情上會傷害自己傷害人，所以呢個角色我先會拍，你叫我做殺人放火嗰啲，我就冇興趣。」陳錦鴻仲話嚟緊想同個仔合寫新書，分享下有自閉症小朋友嘅心態。

至於亦都有好多食肆嘅楊玉梅，話今次只係嚟支持朋友，暫時未有意投資中式食肆：「中餐要好大地方，而且o依家啲租太貴。」佢講到o依家做飲食業，最難係應付租金同留住啲員工：「我成日同佢哋傾偈，聽佢哋講啲感動事㗎！」

問到楊玉梅嘅感情生活？佢話太忙冇時間拍拖：「我拍緊劇，又有舞台劇、電影，工作都排到出年年中，真係冇時間。」

精選娛聞，喺晒《娛果》
http://fb.com/appledailyent