噚日鬼報有個廣告，大家睇完都一舊雲咁唔知咩事，除咗會唔知點解想跟住讀發音，又或者試吓讀歪啲音估餐懵咁之外，想信大家嘅悟性都係參透唔到乜事。

呢個咁奇怪嘅廣告，喺噚日嘅《南華早報》版出現，上面有一堆解述唔到嘅字：「盟唔祀埋來冇vei主唔來冇ueo」，而署名就係「載為Elijahooh」。完全唔明。

原來連DoDo姐鄭裕玲都有留意到，仲影咗張相擺上微博添，留言話：「昨天在看到的一則announcement，睇極唔明！有人明的話，請指點！」有高登仔解讀為:「買唔到杞子(盟唔祀埋來)，無謂煲湯(冇vei)，煮唔嚟(主唔來)，冇魚肉(冇ueo)。」亦有人真心地copy原文去GOOGLEtranslate求解讀。

本來呢件事一陣間就會唔記得，不過神通廣大嘅高登討論區，又有人將呢個廣告，係同另外一單怪事有關。話說舊年9月開始，Youtube用家WebdriverTorso開始上傳一啲得紅色同藍色長方形嘅短片，兩個長方形以唔同形式排列，每一條片都係得11秒，仲係每一個鐘頭都有新片上傳，最後有接近8萬條長方形短片出現。連英國廣播公司都有報道過，仲詳細分析緊到底係乜料(BBC報道呢到有得睇： http://www.bbc.com/news/technology-27238332 )。

講番轉頭，高登就有巴打留言，仲話喇：「同《南華早報》嗰單有關ps：唔講得太多」。

到底係間諜密碼？外星語言？定係純粹電腦唔同字形個code轉換期間出錯咗呢？