收到一批讀者電郵,一啲不妨答覆一下。
(一)讀者問《常誤詞語辨正》一書何處可以買到。該書作者容若,明窗出版社二○○一年四月出版,書局應該有售。
(二)一位讀者C.K.傳來一頁《塘西花月痕(下)》,第四十八、四十九頁,講及何謂「六○六」。呢本書左丁山未睇過,但知「六○六」為何物,多謝C.K.指教。
(三)讀者馬抗議高官要香港電台取消賽馬節目,抗議曾特首指點港台。你嘅意見同好多馬迷一樣,不過我哋把聲加埋,唔及三個大官(曾蔭權、許司長、曾局長),冇話好講。
(四)讀者心急人話兒子在英國得化學工程碩士,繼續在大學做研究,但佢好想兒子去澳洲讀MBA或轉讀藥劑學,問左丁山有乜意見。左丁山認為你個仔已經二十幾歲,應該由佢自己揀,英美國家學生,讀化學工程嘅唔多,美國大學啲化工博士課程,全以中國及亞洲學生為主,啲大化工公司幾需要人,你位公子唔使轉行啫,好嘅化工人才,搵工唔難噃。