特朗普忽然分析員上身，話目前美股好抵買，再補多句鮑威爾份工「百分百安全」，美股就狂彈千點。華爾街上上下下，家陣就好似齋睇住「一男子」開工，逐步演變成「吹水市」，加埋美股8成以上係電腦盤，波幅推到極緻，比阿爺馳名中外的「政策市」更攞命！

波幅越來越恐怖，炒美股的戰友就要留意，睇技術指標操作，需要調整一下買賣心態。一般而言，14 RSI如跌至30樓下已屬超賣，9 RSI超賣區則為20樓下，但睇番本周一（24日），道指的14 RSI插至只有21，9 RSI更只有14，之後才出現反彈，超賣程度為2015年8月以來首次。打個比喻，目前呢種情況最好似「壓彈弓」，越用力去壓，之後技術反彈時的力量也會越大，隨時挾到你唔信。因此，千萬不要一見超賣就撈，或者一反彈就造淡。

另一邊廂，港股跟美股高開後，全程就死跟阿爺，加上年尾市靜細成交，非常不好操作，繼續靠邊站等1月份爆邊再算。值得留意，社科院表示，即使房價暫時下跌，也不宜出台刺激性購房政策，聽落似乎對內房股不利。之不過，講係咁講，但多個內地省市的房地產限購令陸續鬆綁，這不是救市措施又是甚麼？大陸樓市可以跌（同埋要慢慢跌），但不能爆煲，這相信是阿爺的底線，去到呢個位，內房股相信已反映大部份不利因素，短期不宜過份悲觀。

魏力

www.facebook.com/2012jason