走得快，未必好世界！尤其係畫壇快人一步嘅藝術大師，通常生前坎坷，死後先風光，你睇梵谷畫向日葵，幅幅都億億聲就知啦！中國都有好多藝術家不斷俾政治風暴蹂躪，好彩嗰團創作之火冇咁易熄，被譽為現代中國畫先驅嘅林風眠，雖然文革坐咗4年幾寃獄，但出返嚟就繼續揸畫筆，終於得到世界認同，香港回歸10周年都搵佢做藝術icon，藝術館幫佢搞咗個「世紀先驅──林風眠藝術展」，將過百幅作品show畀大家睇。

館方噚日搞咗個開幕禮，3歲時認林老做契爺嘅馮葉女士，眼泛淚光同八方講，「呢個畫展遲咗10年，但遲到好過冇到！」原來97回歸前，藝術館已經想搞林老畫展，皆因佢喺77年嚟香港，到91年喺香港過身，可惜畫展籌備到七七八八，埋門一腳俾人嗌停。聽聞個展覽檔期俾個權貴親戚攝埋，展覽就咁告吹。
事隔10年，康文署終於還番一個畫展畀林老，不過官僚，即係煲呔口中嗰啲精英，是但搵個副署長做主禮嘉賓算數，林老應該冇所謂，好多人卻大歎「精英」唔識貨。八方則認為精英好「精」，走「精面」個精。林老香港畫展多阻滯，或者同佢喺89年六四事件後創作嘅10幾幅《噩夢》系列作品有關。
當時林老已90高齡，不過仍然好有火，呢系列作品色調陰沉，風格有突破，馮葉解畫，「契爺後生時有兩個同學參加學運被殺，係由佢去認屍嘅；佢媽媽則因為封建習俗幾乎被燒死，第一任太太就難產而死，佢喺文革時受批鬥，呢啲感受因為屠城影像一次過爆發出嚟，所以先有咁嘅效果。」

林風眠作品喺1980年代後越來越受國際藝術界重視，法國同日本都為佢搞過畫展，北京、台北、上海亦有辦過大型展覽，惟獨香港冇份。89年台北歷史博物館為林老辦展覽，係文革後第一個華人地方搞嘅林風眠個人作品展，馮葉話契爺好感動，「當時好多舊學生都嚟捧場，可惜嗰次亦係佢最後一次可以親身到場嘅展覽。」
林老生前提倡「用美學‧救中國」，講創作一定有堅持，文革時漏夜將幾百幅畫親手撕爛整成紙漿，當時12歲嘅馮葉亦有幫手，「佢好似親手殺死自己個仔咁，傷心到講唔到嘢，佢話只要對眼冇盲，對手冇斷，全部都可以畫過。」林風眠作品最貴係1965年創作嘅《荷塘》，06年拍賣以740萬元成交。自嘲「青樓名妓」嘅張永霖買落唔少林老先生嘅作品，𠵱家升晒值，不過通通唔關林老事，佢喺另一個世界繼續創作，唔使理塵世俗事。

展期：4月4日至6月3日
地點：香港藝術館
入場費：10元、5元(全日制學生、
殘疾人士及60歲或以上)，逢星期三免費入場
查詢電話：27210116
網址： http://hk.art.museum

1.《舞》1986
2.《夏》1988
3.《噩夢（二）》1989
4.《基督》1989
5.《村》1980年代初期
6.《痛苦》1989
7.《噩夢－打麻雀》1989
8.《南天門》1989
9.《讀書仕女》1950年代
10.《藍衣仕女》1950年代
11.《戲曲人物》1951
12.《斜臥的裸女》1952
13.《鳥》1930年代中期
14.《繁花》1979
15.《遊園》1950年代初期
16.《販子》1938