韓國男團JYJ成員朴有天，去年6月被4名女性起訴，指遭朴有天性侵，隨後警方表示朴有天冇性侵嫌疑，經調查後，警方以誣告及名譽損毀等嫌疑起訴第二名報案人B小姐。

B小姐聲稱前年12月於娛樂場所洗手間內被朴有天性侵，但調查後警方發現B小姐起訴書內嘅供詞有捏造嫌疑，並以假陳述接受媒體嘅訪問。B小姐於一審中獲判無罪，但檢方不滿判決而上訴。

B小姐噚日出席二審時，一度落淚表示無辜：「你哋根本冇見到事發當時嘅情況，點解就話係我誣告？」而B小姐嘅代表律師今日就表示：「B小姐於一審中獲判無罪，但檢方提出上訴而進行二審，外界亦流傳好多失實傳聞，我哋將會舉行記招，以應對傳聞。」據知記招將於21日、二審宣判當日，於法院附近舉行，律師指無論二審結果如何，都會照原定計劃舉行記招。

而朴有天將跟黃荷娜於本月結婚，早前有傳朴有天將於22日舉行婚禮，未知B小姐嘅記招會唔會影響朴有天嘅婚事呢？