今年7.1埋單計數,點算遊行人數各有差異,籌款數目就冇咁大爭議,成績最好嘅籌款之星應該係社民連毓民同長毛,一個下晝籌到15萬幾,較去年少啲啲。秘書長陶君行估計,遊行人士都係比較激嘅民主派,較接受社民連,令佢哋滿載而歸。
公民黨收穫都唔錯,籌到逾10萬蚊,「財神」係湯家驊,捧住籌款箱由維園行到中環,沿途不斷「吸水」,據聞金額十分可觀;民主黨埋數後籌到約六萬蚊,由於佢哋要扣回賣物成本,所以金額較細。當日馬丁現身一氣過賣出700幾本黨史圖片集《一起走過的日子》,相信已封蝕本門。民陣今年籌到20幾萬,剛夠維皮。舊年民陣要求籌款團體上繳一成,今年畀兩成,如果大家合作,民陣財政冇咁緊張。