當年今日

701收料站:啟帆街貨多難造上

蘋果日報 2002/03/28 00:00


呢個星期連續兩隻新股表現都好差強人意,好似賓架陳話炒得嘅衛科創業(8172),上咗兩日雖然股價仍高於招股價,但睇個勢就好似得個頂字咁,唔多似想造上咁款。至於之前話圍晒飛的富昌(916),噚日亦破底收場。
今日就輪到做分銷運輸設備的啟帆(646)掛牌,經紀陳亦同小初講,話唔敢太睇好。
啟帆由招股到𠵱家,一直都低調得很,唔多覺公司有咩公關活動搞作,但之不過經紀陳就話,行家中人個個話掂,話有人願意照起成手貨,結果招股反應亦不負眾望,公開招股部分超額認購成184倍。
點知經紀陳話,咁樣先至唔係好兆頭,佢話啟帆本來賣1億股,每股50仙,其中9000萬股配售,1000萬股公開發售,點知今次公開招股部分玩大咗,搞到要由配售部分回撥,兩者𠵱家變成50:50;原本最重要賣點的貨源歸邊搞到幾乎人人有份,試問又可以點樣炒起?