去年演出人氣韓劇《未生》嘅帝國之子成員任時完，聽晚喺九展舉行粉絲見面會，今晚佢就率先到觀塘apm商場出席記者會造勢，吸引大批粉絲一早到場霸位等見男神。

任時完同粉絲玩遊戲作近距離接觸，其間佢輕搭粉絲膊頭，即惹來其他粉絲呷醋尖叫，亦有粉絲扮彈結他唱出帝國之子嘅歌曲，任時完即風騷聞歌起舞，更用英文要求粉絲唱多幾句，點知該粉絲說：「我唔識喎！」好彩台下粉絲補鑊齊齊唱，緩和了尷尬氣氛。

任時完私底下曾來港旅遊，並透露今次為咗見面會而背中文歌詞，覺得好難。提到佢將於新片扮演50年代韓戰嘅軍人，問佢可要操弗身材？任時完話應該都要，「其實暫時未知要唔要露肉，不過既然扮演軍人，都係做好準備先。」