呂先生於鴨脷洲海怡半島擁有一個單位，兩年前開始出租。直至上月，他得知其租客對單位內家具物件造成破壞後，便決定不再將單位租給該住客。呂先生指出，其後他到區內的萬邦地產要求放租，並放下單位鎖匙，以方便地產代理隨時帶有意租住的客人前往睇樓。
呂先生憶述八月二十三日當天，他往其單位與該名租客作交收手續，並取回租客的鎖匙，臨走前還叮囑該前租客若要返回這單位取走任何物品，就算是他個人的信件等，都一定要先知會才可領走。待一切交收手續辦妥後，雙方便離開單位。
警方沒落案處理
豈料事隔一個多小時，呂先生竟接獲該租客來電，指剛到其單位取走物件。呂先生說：「佢明明交番鎖匙畀我，點可以擅自入到屋？原來係萬邦地產嘅代理帶番佢入去。乜啲地產代理可以咁樣，鍾意帶邊個就邊個入屋嘅咩?!重要拎走啲嘢，咁即係等於盜竊！」
當時非常氣憤的呂先生最後報警求助。警員到場了解事件後表示，任何人未經有關屋主同意擅自進內取走物件，都算違法，惟有關鎖匙卻是呂先生親自交給地產代理的，故也有授權予他入屋之意，而警方最終也沒有「落簿」處理。
「嗰個租客已經欠我兩個月租，屋內廚櫃、牆身都俾佢整到爛晒，佢重要返我間屋拎嘢走，地產代理竟然同佢入屋，咁咪幫賊去偷嘢！大部份搵地產放租嘅，都會放低鎖匙㗎啦，咁我哋啲業主咪好無保障?!」呂先生頓感投訴無門，故向本報反映。