今晚電影《華麗上班族》喺尖沙咀進行首映禮，由於係露天地方，吸引好多路人「睇星星」，今日出席嘅就有導演杜琪峯、陳奕迅(Eason)、張艾嘉、黃芷晴、車婉婉等。

杜sir喺台上被問到咁多年再同周潤發同張艾嘉合作，有咩唔同呢?佢話:「好似唔係好耐，好似張姐咁講，大家冇咩唔同，仲喺電影圈。」司儀問係咪成熟咗?杜sir笑言:「成熟?老咗呀?」

Eason台下訪問，睇佢好似唔舒服，問佢係咪感冒，佢話係有少少唔舒服，係咪呢排太辛苦?佢話:「唔係，之前去咗『鍊』腳，可能嗰度好焗，不過我會繼續去。」講到被張姐讚佢演得好，Eason即話:「多謝，呢部戲淨係睇咗國語版，我滿意成個過程，好好玩，好投入，但我唔係幾喜歡佢(自己個角色)，睇完都有啲唔舒服我經理人甘菁菁都有睇，睇完都話『好憎你』(指Eason)。」

咁係咪代表入到戲?Eason話:「嗰刻好難受，我已經唔like螢幕上嗰個人。」對拍戲增加信心?佢就話:「今次真係學到嘢，但同發哥少戲啲，都想多啲，但唔係我寫劇本。」同對手合作成點?佢話同發哥有場戲，係佢個角色好敬畏呢個董事長(即發哥)，現實中佢都係咁，又笑言:「雖然佢『薄』過我(指發哥瘦)。」

記者笑言好難搵到人厚得過Eason，佢就話:「劉浩龍囉，佢個肺啲骨厚過我。」咁以後會否拍多啲戲?佢話:「我都愈來愈少，拍戲係精啲嘅。」因為冇期?佢話:「唉，我都唔想再提，我仲巡迴緊，內地真係好大，咁多地方，每次啲人都係咁熱情，佔咗全球五分一人口，冇辦法啦，自己久唔久都會返香港唱。」

超級巨星Madonna來港，問Eason會唔會睇，佢話:「好想睇，我未睇過佢演唱會，上次MichaelJackson冇睇，之後佢就走咗。」萬幾蚊張飛會買?Eason笑住反問:「買呀?。」唔買唔通拎?佢話:「唔係返公司有個信封嘅咩?我太天真，我公司好少人之嘛，得我一個artist，又唔係另一邊環球，又有校長（譚詠麟）又有（李）克勤。」咁想要幾多張?Eason話:「一家人都係得3個啫，我唔會帶埋狗仔去嘅。」