當年今日
關於我們

【辣媽出招】爆個女有富二代男友 馬賽媽指汪子琦否認同志

蘋果日報 2013/12/06 06:00

出櫃火雞馬賽對不起汪子琦Laura純純兔因為懂得,所以慈悲東華

外表弱質纖纖嘅純純兔馬賽,有個有錢契媽做指路明燈,歐洲之旅又成功速食內地製片汪子琦、「欣賞」其在內地人脈廣,而且歐洲行豪花40萬——都係富婆Laura、即汪子琦正印俾晒,Laura事後爆料更狂寸純純兔連一杯雪糕都唔肯俾錢。純得嚟數學科成績應該都幾好。

日前有報道話,純純兔同汪子琦一齊之後,即月入家用20萬,仲有本去新加坡賭場豪賭,豪玩上限十萬坡幣(約六十多萬港幣)一注嘅百家樂,而且有圖有真相,馬賽專業「賭相」,嗌牌面不改容,更有賭客話佢鋪鋪嗌牌,十萬十萬(港幣)咁落注添。

之不過,純純兔喺佢今日出街嘅「喊晒宣言」裡面,就百般委屈咁話自己當日只係陪朋友去賭場。陪賭都陪得咁專業,純純兔真係夠晒朋友。

該報道更指,汪子琦對純純兔極為慷慨,除有每月20萬家用,購物消費另計,仲送埋名牌送珠寶首飾。有指兩人交往僅兩個月,汪子琦已經喺純純兔身上使咗超過200萬,報道更指一直視Laura為「新抱」嘅汪父被激到入醫院。

咁有份陪純純兔馬賽一齊做訪問解話嘅純純兔媽媽又點睇?佢只係話,曾經問過汪子琦,汪子琦話佢本人唔係同性戀。馬賽媽咪又話反對「這件事」(馬賽爆攣情),更指個女已經有個內地富二代男友。

純純兔同媽媽一唱一和,難怪汪子琦扯火,更直指 「曾以為最是真心載不動,可是奔赴千里之後,才發現不過是一場設計,這三個月我付出的真心、無微不至地照顧換回來的不過是你的謊話連篇!」 「心痛絕望…但我真的很對不起Laura!」 更喪寸馬賽根本冇資格講 「因為懂得,所以慈悲」 呢八個字。

據知呢,純純兔媽咪都係高人,有報道指,有人獻計俾純純兔,想要層樓揸手,後汪家及時阻止;之前又影到純純兔母女於上月底(26號)密會樂易玲商討復出對策添。