英國《BBC》報道，英冠布里斯托城領隊李爾莊遜為咗有機會喺禮拜三晚嘅英格蘭聯賽盃半準決賽鬥曼聯後，有機會同紅魔鬼領隊摩連奴見面，特登走去買咗支價值450鎊（大約4,710港幣）嘅紅酒「孝敬」摩佬。

李爾莊遜承認自己好希望可以喺賽後同摩佬見面：「我梗係希望有咁嘅機會喇，我花咗450鎊買支紅酒㗎，仲要打爛阿囡個豬仔錢罌先夠錢買，呢支酒係由葡萄牙空運嚟㗎。我哋做過研究，知道摩連奴特別鍾意呢支酒，仲要人專家負責斟酒。所以我希望佢會賞面同我傾幾句，等我偷師五分鐘、十分鐘都好，佢肯定係最好嘅領隊，管理能力係世界級，好似我咁嘅年輕領隊，當然希望可以學似摩佬咁喇！」

李爾莊遜所買嘅呢支紅酒叫Barca Velha Red，年份係2004嘅，外國嘅評酒網站喺五星滿分當中，畀呢支酒四星半，專家嘅評分亦都有94分（100分滿分）。想得閒扮下摩佬嘅球迷，不妨試下出街搵呢支酒返嚟嗒番杯！

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM