講起江美儀，你會諗起主宰黑白兩道嘅Rainman，定係佢喺《名媛望族》入面嘅黑絲look呢？No la，嚟緊佢會多個形象。

星期三就46歲生日嘅江美儀，最近收到份大禮，以7位數字酬金為拍「謝沇錤豐胸專門店」廣告。今日佢都係一身黑，不過唔係黑絲喇，而係換上黑色Bra Top同黑色貼身運動褲，晒出3吋事業線，去到將軍澳拍呢輯廣告。

老闆娘謝沇錤喺現場送咗99枝玫瑰同蛋糕預祝江美儀生日，而江美儀話：「今次接拍呢個廣告，唔係只賣弄胸部，係做埋按摩通淋巴，通淋巴對女人好好，而我做咗之後，個胸的確升咗一級，着衫好睇咗，不過個人就重咗。」

另外，江美儀即將要飛到馬來西亞拍外景，到時會同拍檔滕麗名一齊過生日。而佢自己就啱啱去完日本旅遊，佢笑話：「今次好瘋狂購物，手袋都買5個，同款都兩隻色，當係辛苦工作嘅獎勵。」