曼聯中場保羅普巴喺兩星期前歐聯首輪分組賽對巴素利腿筋受傷傷出後，一直冇人知佢幾時復出，連領隊摩連奴上個禮拜都曾經話「唔知佢唞多12個禮拜定12日」，點解會咁？原來曼聯而家連點樣醫普巴都未決定好，咁又點會知佢幾時復出，究竟發生咩事令紅魔猶豫不決？

據《ESPN》講，曼聯一直同芬蘭籍嘅肌肉修復專家Sakari Orava保持聯絡，搵佢嚟醫普巴，而佢就係今個月幫巴塞隆拿翼鋒奧士文尼迪比利開刀嗰位醫生。呢位72歲老醫生話：「普巴嘅傷同迪比利唔同，所以唔一定要開刀。」據講曼聯方面梗係唔想普巴做手術，一做隨時休息到出年，所以一直拖住先睇吓佢情況如何，不過如果今個禮拜仲係冇乜進展，普巴就要去芬蘭做手術。