少爺占個talkshow《少爺占朱豔強口口笑長長99》今晚喺新光舉行尾場騷，喺個show尾段，少爺占專登播咗佢前兩日用電話拍低嘅囝囝片段，片入面佢囝囝坐住BB車係咁哈哈笑好得意。

少爺占show後受訪都笑言佢有「分享病」，鐘意分享個囝啲嘢，佢又話今次5場show比之前用嘅氣力大好多，同埋做到自己想做嘅嘢，好似有liveband喺台上同步演奏。佢又繼續講個仔:「想再拍都拍唔返個仔嘅搞笑片段，做呢個show有啲內疚，冇乜時間照顧個仔，有次老婆餵水比個仔飲，我問做乜餵水，因為佢一向飲奶，但原來個仔已經可以飲水，我唯有同老婆講男人要出去搵錢。」

咁問佢有冇機會放假?少爺占就話:「都有，嚟緊有10日假，同老婆出去date幾日，唔會帶個仔，要訓練爸爸媽媽(爺爺嫲嫲)照顧小朋友，佢哋都雞手鴨腳，初初都有少少唔放心，有時老婆睇show掛住個仔，都諗唔知佢哋搞唔搞得掂。」

記者笑阿占有「爸爸病」，佢直言:「個仔10歲之後會掛住溝女唔理自己。」咁會唔會再生?佢話:「我好穩陣，應該就唔會，唔想太太辛苦多次，老婆好忍得，但上次(生仔)佢痛左23個鐘頭會死，係佢揀唔開刀，唔想有條疤，又想快啲康復返打排球。」