癌魔係可怕，要對抗癌症，除咗要堅毅，仲需要有好嘅醫療，馬浚偉嘅媽咪生前曾患有鼻咽癌，妹妹也患過乳癌，作為癌症病友家屬，佢深深體諒當中困難，馬仔今日以「與癌友同路大使」身份，到黃埔出席蘋果日報慈善基金主辦「與癌友同路步行籌款2018」活動。

馬仔喺開步禮前先同三位病友同家屬做分享，馬仔細心聆聽兩位女病友抗癌過程，聽到另一位家屬嘅太太被癌魔帶走，剩下兩父子相依為命，馬仔耐心安慰，給予佢哋鼓勵，大送正能量。

馬仔嘅媽咪早年已離世，喪母打擊一度為佢帶來抑鬱後遺，其後馬仔又獲悉27歲嘅妹妹發現有乳癌，當妹妹接受艱辛化療過程，馬仔接咗妹妹回家靜心休養，佢話：「作為癌症病人家屬，唔係就咁當係一個考驗，因為患者本身接受佢有癌症都唔容易，同樣身為家人，痛錫佢哋，我哋個心都係碎咗，都好痛好擔心，重點大家要坦誠，幫佢一齊去分擔，減低病者內心恐懼，做治療真係好辛苦，希望一家人去share，除咗病人，仲有家人嗰份壓力，最緊要大家一齊攞出嚟講。」馬仔表示妹妹乳癌已康復，佢話陪妹妹捱過呢關，佢多謝妹妹給予佢好多正能量：「我好錫屋企人，妹妹最細，不過佢面對癌症好樂觀，我叫佢搬過嚟我屋企，買咗醫療設備，空氣淨化器，搞到無菌好乾淨，等佢化療期間有個舒服環境，我擔心佢丈夫要工作，我睇到妹妹咁樂觀，病人辛苦冇人明白，如佢樂觀對佢病好有幫助。」

馬仔關注香港貧富懸殊問題，連患病都受到影響：「一個大藥廠花費好多資源研發新藥，成本高，唔同成本藥有唔同副作用，貴嘅化療藥，佢副作用較低，但一般普羅大眾未必負擔到，呢個唔怪得藥廠同政府，當中有經濟考慮。」馬仔呼籲大家有錢出錢，有力出力幫助各位癌友，佢今日就身體力行，帶同自己隊伍支持慈善步行活動，做個好榜樣，其實馬仔近日埋首準備下月舞台劇《生前約死後》，該劇於1月5號首演，現時日日都綵排，但仍願意抽出寶貴時間行善，為癌症病友打氣。佢話：「有能力嘅人要捐錢，真係唔好睇少有錢出錢，有力出力，好重要，好多情況，有錢真係需要你出錢，香港始終貧富懸殊，如果你哋肯做，我會好感激。」呢次活動，主要為逾150位癌症病友支付部份治療費，佢哋費用每月超過200萬。馬仔再話：「病人治癒過程唔容易，繼續努力，奇跡會出現，開心啲就得。」

馬仔接受訪問後就同壹傳媒行政總裁張劍虹先生喺儀式上鳴笛，同參加者及馬仔義工團隊「iStudy」一齊起步，為癌友及其家屬出錢出力。

精選娛聞，喺晒《娛果》
http://fb.com/appledailyent