歐陽震華(Bobby)喺無綫工作超過30年，拍過《壹號皇庭》、《陀槍師姐》、《洗冤錄》等經典劇集，但呢位收視福將最近竟然不獲無綫續約。據悉Bobby經理人Lydia同無綫製作資源部總監樂易玲傾談合約期間發生爭拗，有人拋下一句「有啱先搵你」，最後不歡而散。事後有無綫中人指，今次話唔同Bobby續約，係有人當中「假傳聖旨」。

究竟係邊個同Bobby經理人講呢句「有啱先搵你」？版本各異。今日有周刊報道引述樂易玲謂，傾約之時，Bobby經理人Lydia、樂易玲同藝員部同事一齊傾。樂小姐表示平時多數由佢同藝員傾約，但當日就唔係，主力係同事同Lydia傾。至於「有啱先搵你」呢句，樂小姐指無綫方面冇咁講過，反指係Lydia講嘅，又謂覺得冇人需要為此「誤會」負責。

依家Bobby份約，就由戲劇製作總監曾勵珍同佢傾，唔使樂小姐follow喇。Lydia接受《蘋果》電話訪問時，卻講出另一個版本，同樂小姐呢個，出入頗大。

1.樂易玲發言95%
樂易玲版本；傾約時由藝員部同事主力斟洽發言。
Lydia版本：「唔係出面傾，係我入TVB，去佢（樂易玲）office。佢約我，有同事陪同，大部份說話佢講嘅。同事講5%都唔知有冇。」

2.「有啱先搵你」語出樂易玲？
樂易玲版本：指「有啱先搵你」係出自Lydia。
Lydia版本：「我哋合作多年，上一份約三月完咗，我哋extend咗好耐。公司出咗offer俾我哋，baseonoffer去傾，有少少拉鋸。但有日約去office傾，入到去完全唔係baseon嗰樣嘢去傾，講晒其他嘢。」
「佢(樂易玲)自己意思話，有啱先搵我哋啦，仲主動去解釋我聽，第日有嘢啱時，到時先搵你哋去簽。即係一個形式簽一年約，每個人都係咁。我話:『哦，咁樣呀？』我唔知佢係咪我repeat佢啲句子當係我講呢？哈！」

3.無綫下令唔使樂易玲傾
樂易玲版本：樂易玲表示同Lydia上次傾完之後，達成共識，各自返去再傾，Lydia聯絡Bobby，樂小姐就同製作部商量，傾傾由一年拍一劇改為三年拍兩劇之條件。
Lydia版本：(表明拒絕同樂小姐傾)「唔係我哋搵珍姐(曾勵珍)，我哋搵珍姐係求證。我打畀珍姐話有件咁事(不獲續約)，珍姐同我講冇聽過，呢個唔係公司意思，你畀我處理吓件事。出報紙時就去到更高層面，去到李寶安，叫珍姐全權處理呢件事。我就同珍姐通過電話，就直接同佢傾，唔需要同藝員科傾。」

4.Lydia：做嘢啫，但真係唔好玩嘢囉！
樂易玲版本：「唔明白點解搞到咁大件事，定係報道誇張咗。根本唔係咁大件事，好快就會水落石出。」
Lydia版本：「做嘢啫，唔好玩嘢，嘥時間。做嘢之嘛，中唔中冇所謂，咁大間機構，有同事夾啲，有同事冇咁夾。做嘢啫，但真係唔好玩嘢囉。
「是非？咁大間機構實有，我從來唔需要玩呢啲，有啲人形容係佢哋公司內部問題，人哋話演員走晒，製作部咪冇人用？」