由馬志威、林耀聲主演，講述綜合格鬥（MMA）的熱血勵志電影《入鐵籠》，改編自真人真事，比《激戰》來得更真實貼地，馬志威飾演的角色，源於真實MMA天才拳手，其弟林耀聲更是最紅的地下拳手，兩人為準備拍攝，每日無間斷操肌練拳，接受地獄式訓練之餘，馬志威為一場瘦身戲，要30小時不吃不喝。

馬志威在戲中飾演不敗拳手，部份參照現今格鬥天王麥克格雷（Conor McGregor），現實中馬志威只學過西拳，今次是首次接觸與艱苦必然牽上關係的MMA。馬志威表示，訓練時吃了不少苦頭，在開拍前一個半月接受訓練，每日過着拳手的生活，早上接受巴西柔術及拳擊訓練，下午健身，夜晚排練動作，高度體驗拳手生活之餘，更每星期7日無間斷訓練，沒有休息日。馬志威說：「辛苦就梗，接咗就冇辦法，我拍開愛情片，導演話信我可以做比較男人角色。導演同我講，接呢個角色一定係好辛苦，當中好多嘢未受過訓練，動作完全唔識。」

兩位演員一齊操練一齊節食，馬志威說：「我哋每日傾嘅話題唔係戲，而係食，每日睇吓對方個飯盒，有雞胸、烚菜。戲中講我減磅，拍攝一場磅重戲前，我30個鐘冇飲水，去廁所啲尿都係啡色，瘦到塊面削晒。」馬志威指節食是辛苦，但精神上是開心，每天期盼拍攝成果，他說：「肉體上辛苦係節食，因為我好鍾意食嘢，當時奶茶都冇飲過一杯，拍完上磅戲，我即時萬歲請大家食下午茶。」經過今次拍攝，馬志威表示想多拍動作戲，他說：「每日照鏡同自己講I will do it，我一定得，開頭都懷疑自己用個半月時間操唔操練到，最後得咗，說服自己好緊要，只要肯做，冇嘢係做唔到。」

在戲中綽號「電兔」及「爛仔交王」的林耀聲，可說是從未接觸過動作戲，但卻擔起整部戲最多打鬥場面，他說：「最大困難係動作戲，齣戲裏面最多打鬥都係我，我同馬志威喺拳館對打同決賽，仲有一場喺工廠區同鬼佬打地下拳，嗰場戲完全冇綵排，喺現場即場度出嚟，對我來說係挑戰同突破。」林耀聲指拍攝前未接觸過MMA，只玩過泰拳當做運動。今次為拍攝學習多種武術、拳擊，每日訓練8至10個鐘，維持個半月。林耀聲說：「當時同期拍緊《起底組》，兩邊走，我好想挑戰呢個拳手角色，進行連串訓練過程係辛苦，回想番係值得，只係肉體上辛苦。」

林耀聲表示，角色參考日本已故MMA拳手山本德郁，山本是一個身手非常敏捷的拳手，在台上像馬騮般敏捷，林耀聲說：「戲中決賽場戲分3個回合，分咗3日拍，每日拍17個鐘，朝早去到啲肌肉操到脹晒先拍，打咗10幾個鐘之後就冇晒，長時間動作消耗晒所有肌肉，拍到夜晚變咗條柴，對我嚟講係有個遺憾，因為唔連戲，每拍攝之前都要做掌上壓谷肌肉，拍完之後都怕咗，有放肆唔做健身一段時間。」林耀聲慶幸得到教練、馬志威及楊柳青在身邊鼓勵，互相支持，他說：「如果冇鼓勵真係好易放棄，當身邊人支持就會重拾信心，訓練時都有諗太辛苦，早知唔接拍，接咗惟有頂硬上。」

化妝：Jenny Tziong（馬志威）、Iris Sze（林耀聲）
髮型：Iris Sze（林耀聲）
場地提供：Fighting Arts Center

《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw

全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef