26歲嘅王敏奕同曾國祥拍拖四年，本來一直都相安無事，曾志偉仲認定咗呢個新抱仔，但係早前本土Rapper火炭麗琪喺Ig Story貼文，鬧爆王敏奕拆散咗前度男友同另一半(新聞連結： https://bit.ly/2raGDs4 )。

今日王敏奕同唐文龍喺九龍灣出席長者家居探訪，講到被火炭麗琪喪插，王敏奕話唔想多講，又話唔識攻擊自己嗰個人，覺得唔係事實就唔會理，至於有冇因為咁而唔開心兼且覺得無辜？佢就話：「唔知，唔講喇，希望做自己覺得啱嘅事，大家開開心心。網上好多人都無辜，好彩大家都支持同了解我，唔使為側邊嘅事影響自己生活。」

被問到有冇搵前男友搞到被誤會，王敏奕話：「每個相識都係緣份，冇必要成為仇人，我冇乜仇人同敵人，關係已過去。」至於會唔會因呢件事聯絡前男友？佢話：「呢件事可以回應嘅就係網上啲嘢唔好亂信，無憑無據，如果我同你講嘢人哋嬲，我可以點？」

唐文龍之前同楊柳青傳緋聞，問佢有冇帶女朋友去美國見家長，唐文龍話自己冇女朋友：「我從來冇承認任何人，影咗就係咩？」亦暗示呢啲（緋聞）新聞，都係因為宣傳：「你睇啲緋聞通常幾時有，嗰排我哋拍緊劇，大家係朋友，間中有聯絡，但近呢兩個月冇見面。」

精選娛聞，喺晒《娛果》
http://fb.com/appledailyent