馮盈盈與醫生男友鍾文浩（Martin）拍拖以來，愛得甜蜜，fans都以為她將做醫生夫人，怎料今日忽然宣佈分訊，結束4年情，下午她返TVB開工拍《逆天奇案》，身穿黑色長袖透視裝的馮盈盈，稱心情已平復，被問到分手一事，仍忍不住落淚。

馮盈盈指二人這個月在雙方有共識下宣佈分訊，經過大家深思熟慮作出的決定，當中並不涉及第三者，不希望親友為他們擔心，馮盈盈坦言同居後出現不少問題，承認同居試婚失敗，大家相見好同住難，一齊生活有很多事要重新適應，她續說：「分開有好多因素，比較複雜，住埋一齊後，有好多轉變要去適應，適應過程中發現原來大家相處最舒服係做番朋友，加上我哋係喺事業發展期，好多機會、機遇要把握，大家分開後會多啲時間及心機去為自己想要嘅嘢努力。」

馮盈盈認圈外人對於藝人接吻場口比較難接受，不過這個並非他們分手的原因，Martin亦體諒、包容及尊重她的工作，問到會否因為同居後分手覺得很失望，馮盈盈爆喊說：「我諗冇……又冇話失望嘅，Sorry……（哽咽）咁我又覺得冇話係失望，其實大家兩個人真係好自然一齊住、一齊生活，然後又真係好自然見到現實中有好多挑戰同轉變，大家經過深思熟慮去研究過當中嘅原因，或者係咪真係適合呀等等，但係真係發現分開，對大家都係一件好事。」

講到會否抽時間放假散心，馮盈盈稱目前仍有工作在身：「因為我仲拍攝緊新劇，空閒嘅時候都會畀自己唞吓嘅，但係工作時就會好專注，投入番，希望做好我份工，同埋嚟緊新劇會去泰國拍攝，都係一個機會畀我更加專注投入工作囉。」

她稱目前二人仍是朋友關係，大家都搬離愛巢，已有公平方案處理層樓，她解釋：「我哋keep住有contact來往，所以例如話一啲business、好似關於一啲我哋以前一齊居住嘅地方點樣處理，其實我哋都有一個方案得到大家嘅共識，同埋係對大家都好公平嘅方案去解決，所以大家唔使擔心，總搵到方法嘅。」語畢她再度哽咽。

Martin早前擲過千萬在沙田置業，馮盈盈瞞着父母貼首期，將自己這兩年來賺的辛苦錢，幫男友買樓做業主，即使物業只是男友名下，她亦在所不計，於今年6月搬入愛巢做女主人，初時更每天執屋做到凌晨一、兩點，男友負責供樓，她負責水電煤及日常生活開支，馮盈盈曾爆二人同居不久已有不少衝突，她稱自己有生活品味，飲嘢要分開不同的杯，每人買了10隻杯，但男友卻習慣用同一隻杯，同時馮盈盈講過自己入行後脾氣超大，男友都一直安慰她，未想到住了半年，二人最終分手收場。
-----------------------------
蝙蝠俠誕生80周年
點擊即睇85頁經典大回顧
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇