半年前寫過利豐（494），回顧佢由藍籌神話變成地獄股，近年更是頻頻變賣家檔，將利邦（891）賣掉，又將形容為冇前景的業務售予大股東馮氏，雖然爽派特別息，但作風已越來越似一隻股仔。利標（787）賣北美業務完成了，派0.28元特別息，除淨後仲十合一，但當中亦有一段小插曲。

公司在2月公佈，特別息除息日為3月5日，並提供一個選擇，就是以股代息，當時大股東馮家仲未決定是否選擇以股代息，不過萬一選擇要股唔要錢，由於佢哋持有逾3成股權，按例只要增持超過2%的股份，就要向全體股東作出強制性全購，以那個以股代息的換股價，就是3月5日至11日這五個交易日的收市平均價，再打5%折讓。

除息當日，利標股價一度大漲三成，市場就是憧憬馮家會利用今次機會低價增持，按常理小股東都會揀袋0.28元而不會換股票，換言之，馮家要提全購的機會極高。雖然只係技術性全購，全購價就是換股價，吸引力有限，但這個換股價就變成了炒鬼們入場炒的止蝕價。不過除咗除凈當天的早上大炒之外，之後幾日都係反覆向下，而北水就在除凈後首兩天大舉入市，兩日買咗4,400萬股，儼如知情人士的手法，咁啱利標將於3月11日被港股通剔除，之後北水只能沽不能買，可能咁先買得急。

好喇，當平均價定晒，小股東決定晒要股定要錢之後，利標發出通告，話大股東最終決定部份接納以股代息，增持1.99%股份，即係話無須作出強制性全購，「止蝕價」即使失效，翌日梗係裂口急跌啦。

這個1.99%之所以咁精準，好大原因大係股東知道有幾多股東換股，青冰冇深究此舉是否犯規，但如果要揀一個足球員去比喻大股東，青冰會答：拉莫斯。

青冰
http://fb.com/chingbing888
本欄逢周四刊出