古巨基早前聯同《蘋果動搞作》一齊surprises佢啲fans！我哋邀請咗佢四位fans做訪問，成個過程基仔就暱藏喺另一間房聽住班fans點講自己，完全被朦在鼓裏嘅fans，除咗真誠咁講自己點解鍾意基仔之外，有位仲口快快咁話古太唔算靚，搞到喺一邊聽到嘅基仔即時忍唔住笑。

第一位受訪者叫Alan，佢話自己小學時候已經鍾意基仔：「嗰陣時覺得佢唱歌好聽，同埋好得意囉覺得佢，睇佢做節目好古靈精怪嘅，仲有佢個造型呀，唔係傳統靚仔樣。」Alan話覺得基仔個人好有善心，佢仲記得有年基仔呼籲fans唔好再買禮物送俾自己，又建議fans將啲錢用嚟幫助其他有需要嘅人，於是Alan就謹記偶像說話，由嗰一年開始，助養咗兩個小朋友，至今已經15年。
訪問尾聲，基仔突然現身，Alan即時嚇到呆咗，不斷講：「我知道你今日唔會嚟！點解你會係度？」之後基仔讚Alan助養小朋友嘅行為，又話估唔到自己可以感染到歌迷做啲咁有意義嘅事。正當Alan同基仔Selfie留念之際，Alan媽媽咁啱就打嚟，於是百厭嘅基仔即時代為接聽：「媽媽？我今日有少少感冒，你可唔可以幫我買點數卡呀？」Alan聽到當然無上當，不停反問佢係邊個，就算之後基仔講返自己係古巨基，Alan媽都唔太相信，要基仔影相確認，相當搞笑。

第二位受訪者Stella，被問到自己有咩低潮期係靠基仔幫佢渡過？Stella就話：「低潮我就唔多，但有時教事，因為我有教自閉症小朋友，我哋唔可以教到佢自閉症好返，只可以用啲方法去幫佢學習，所以會袋住基仔本《IQ王》係身，可以俾小朋友睇，喺我自己工作上都用到。」基仔喺隔離房聽完就不停點頭。
訪問完成後，Stella見到基仔突然現身，即時又驚又喜，仲忍唔住喊咗出嚟，基仔見狀就攬實對方以示安慰，又讚Stella係位好老師，笑言自己都變咗佢fans呀！

第三位受訪者文慧，問到佢知道基仔結婚時有咩感覺？文慧就口快快話：「開心囉，雖然有時見到啲娛樂新聞話佢太太唔夠靚，但我覺得愛情唔係用靚唔靚嚟衡量，係講點維繫。」基仔聽到即時忍唔住笑出嚟。之後驚喜現身時，文慧唔相信基仔竟然出現係自己面前，仲嚇到不停咁退後。基仔同文慧big hug之後，就講返古太被指唔夠靚件事，基仔話：「我很開心你話我真人靚過上鏡，不過古太聽到那些人話她不靚呢‥‥她真的不夠靚，但係我鍾意佢內在美。」完美咁氹返古太。

最後一位受訪者Suki，話自己從來無見過基仔真人：「細個媽媽唔俾入歌迷會，到我出嚟做嘢之後，入歌迷會又好似好低能咁。」雖然無見過基仔真人，但當基仔現身喺佢面前時，Suki反而係4位fans入面最冷靜嘅一個。不過聽到基仔建議佢可以加入歌迷會，Suki都即時話：「好呀好呀！就依家啦，依家填表！」

記者：倩宜、吉吉
攝影：陳俊強
攝錄：Neo、馮峰

場地提供：Mustard Seed