【珠寶小姐決賽】唔係著得少就係正囉!谷胸莊端兒Failed
徐子珊貝安琪姚書軼莊端兒
莊端兒、徐子珊、貝安琪同姚書軼等今晚出席灣仔會展嘅「第五屆香港珠寶小姐決賽」,莊端兒着咗件好似泳衣嘅衫出面加長紗谷胸出現,佢話:「入面嗰件真係泳衣,外邊件紗買咗冇機會着,見今晚啲珠寶咁璀璨咪着嚟襯番,件紗好修身,所以選擇咗件一件頭泳衣。」
自從同經理人薛太——諸葛紫岐解約之後,莊端兒話近排冇工作,所以陪家人,佢話:「冇拍拖之後,發覺陪家人好重要,上年自己割咗個膽,媽咪身體又唔好,係腸胃問題,但要好長時間調理番,加上媽咪有三高,好怕佢中風,所以自己好擔心。」講到佢冇工作即係冇收入,佢話:「係呀,所以而家要食屋企人嘅。過埋農曆新年先至再睇吓媽咪情況點。」
莊端兒既要負擔媽咪嘅醫療費之外,自己嗰筆都唔輕,上年割膽要成20萬,好在自己有買保險。而佢話今晚嚟冇錢收,自己係2013年至2015年珠寶小姐,所以專登去撐場。講到佢同諸葛紫岐合約糾紛,佢話自己同佢仲有合約同官司喺身,但簽咗保密協議,唔講得。
囝囝9個月大嘅貝安琪話,婚禮訂喺出年5月,但未決定喺邊度搞。至於徐子珊就着tube dress出現,佢話網上珠寶生意仲搞緊,有好多人想同佢合作,但自己未有時間,因為讀緊心理學,又要拍劇同返內地做綜藝節目,所以問佢會唔會開實體店時佢都話未知,子珊話:「實體店舖租太貴啦,加上自己成日飛嚟飛去,又怕自己唔識做生意。」佢話網上珠寶店投資過百萬,o依家已經回本。
更多娛聞,喺晒《娛果》
http://fb.com/appledailyent