歌手露雲娜曾於七、八十年代唱片銷量與許冠傑鄧麗君睇齊，日前佢接受梁泰來嘅《1圈圈 星光背後》訪問，講到26歲嗰年，露雲娜為愛情放棄幕前嘅一切，佢話婚姻初期非常開心，如果唔係都唔會為前夫喺1990年生咗囝囝Bryan。

露雲娜透露當時兩夫妻曾計劃再生小孩，可惜意外流產，佢話發夢都冇諗過之後夫妻間竟然發生問題，佢話：「最大打擊係我根本意識唔到發生問題。」1995年離婚後，對露雲娜傷害太大，連患咗抑鬱都唔知，只係避見所有朋友，不停食甜嘢「療傷」，甚至每天飲四、五罐汽水，令體重由90幾磅暴肥至160磅，期間甚至諗過輕生，「有，我真係有諗過(自殺)，但當我想做嗰一刻，我突然見到囝囝個樣，佢突然喺我腦海出現，我立即好嬲自己，即刻將所有嘢掉晒！」

露雲娜又話當時斷絕同翁靜晶、周秀蘭等好姊妹接觸，事關共同朋友都會令佢諗起前夫，佢話：「離婚之後，我真係想收埋自己，唔想見任何人。」直到一日，露雲娜發現自己病情嘅嚴重性，主動求醫，食藥兩三年就痊癒，佢笑言要多謝facebook，令佢同朋友重新聯繫，及遇上佢嘅現任丈夫Perry Martin(相關新聞﹕ http://bit.ly/2gsnuwr )，佢話：「監製葉廣權因為facebook先搵到我同Eason合唱《講男講女》，也因facebook，才俾我同現任丈夫重新聯系上，我真係要好多facebook。」