速食世界，做任何事均講成本效益，我們寫馬的最大成本是時間，若不好好管理，變相浪費自己的時間，所以不能不正視現實，放棄某啲馬、若干馬房及騎師。
自己另一身份也是投注者，身為馬迷有得揀，一場14隻，無隻鍾意可以唔買，無焗賭，玩與唔玩都由自己話事。經常提醒自己，不要貼或不要買某類馬，可是仍偶而會犯錯，暑期是檢討提出一些犯錯個案，警惕自己之外，也希望大家唔好似我咁傻！
李易達、吳定強與胡森操練手法偏柔，若見此三廐的馬，突然由疏操變密操，其實未必好；大家睇落，可能覺得我有點心理變態，唔鍾意疏操，多操又話要小心。不過要諗一諗，向來操得少運動少，突然加大運動量，可能頂唔順，唔係實好！
中招個案多是胡森的馬，把口話疏操變密未必好，然而有時見到佢啲馬突然改變操練，唔知點解成日好似被鬼迷。
「好易搵」已是胡森演出較準的馬（睇真啲又唔算），季中曾中過招，這馬季初11月9日贏馬前，埋門連拍四課，算係多做工夫，跟住再跑兩場都繼續上名，季中開始梅花間竹，二月中入Ｑ後，再出回一場，以馬房少打叠好模式，合理呀！4月16日復出前，試課大閘走勢好，查吓成半年無試閘，突然咁做，仲唔係波？結果梗係冇啦！