鄉議局今日改選新一屆主席同副主席，劉業強喺無競爭下冧莊，完全唔令人意外，反而兩個副主席之位，有啲出人意表。早前盛傳連任有暗湧嘅林偉強以及未算被睇好嘅沙田鄉委會主席莫錦貴，最終雙雙當選，其中莫錦貴更加以一票之差險勝，接替原大埔鄉委會主席張學明棄選後嘅位置，升呢為新嘅副主席。

鄉議局嘅領導選舉分3個約角逐。喺大埔約，有3個人參選副主席，除莫錦貴外，尚有西貢北約鄉委會主席李耀斌同鄉紳界新貴、大埔鄉委會主席林奕權，而林奕權賽前仲被人視為熱門，結果呢場龍爭虎鬥，由鄉事資歷較深嘅莫錦貴以58票、較林奕權多一票勝出當，李耀斌則有21票。南約則係林偉強同梅窩鄉委員會黃文漢之爭，結果賽前被指有機會嘅黃文漢，被獲77票嘅林偉強以17票之差擊倒。

新一屆領導任期即日起為期4年，劉業強指選舉過後，鄉議局會一團和氣為鄉民服務，指香港同新界正值多事之秋，大家要團結努力，任內挑戰肯定係丁權案，有信心會勝訴。

民陣6.9反惡法遊行

日期：6月9日（日）
集合地點：銅鑼灣東角道
時間：下午2時30分集合，3時正起步
遊行路線：銅鑼灣東角道遊行至金鐘添美道立法會
（資料來源：民陣）

---------------------------
【六四30】守住歷史 拒絕遺忘
https://hk.adai.ly/zdzKtt2RiW