有錢唔一定有品，同樣地，揸靚車同駕駛技術或者安全意識，都係完全冇關係。好似老蘭（蘭桂坊）呢架「狂牛」林寶堅尼咁，就完美示範呢個理論。

前晚8點幾，老蘭有林寶堅尼表演「超低智唔拉手掣極速溜前」。由閉路電視片段見到，一位外籍型男當時坐咗喺斜路上一間餐廳嘅靠街位置，架無人駕駛嘅黃色林寶突然溜前衝咗落黎，停咗喺外籍型男面前，好彩佢眼明手快，連人帶枱向內縮，而林寶亦及時停低。

好彩平日嘅老蘭人唔算多，如果唔係就大鑊。同死神擦身而過嘅外籍型男定一定神之後，同其他顧客望住部車研究，更加豎起拇指，係讚緊個車主，定係讚部車靚呢？由於部黃色林寶，無論外型同擺位都太搶眼，好快就吸引途人圍觀，舉機拍攝，擾攘咗差不多兩分鐘，有一位白頭佬施施然行埋黎，原來佢就係車主。大哥，雖然行開一陣啫，但你唔會唔知呢度係斜路嚟架，只拉一吓手掣有幾難呢？見佢上車前，sorry都冇句。喂！你唔志在架車，但途人嘅命仔好寶貴架。

呢段片亦已經喺網上瘋傳，網民批評「有錢買不代表有能力揸」，小記奉勸不如上堂改進駕駛態度先啦！

你敢爆，我敢獎！ 即Call《蘋果》24小時爆相爆片熱線 ：63836568